Loading...
Wie’s Ons? 2017-09-06T11:26:06+00:00

GESTIG DESEMBER 2004

WIE’S ONS? WAAR HET DIT BEGIN?

Vroeg in Desember 2004, het eienaar Niël du Bois en ‘n aantal werkers/vriende met Brolloks, ‘n Chev-lorretjie van 1950, hooggelaai met planke, toue en nette op Mosselbaai opgedaag – om na dekades as joernalis sy vrye gees uit te leef en ‘n seekos-eetplek êrens op ‘n strand oop te maak.

Met die Genade van Bo (en te danke aan ‘n munisipale amptenaar of twee wat die visie van ‘n seekos-eetplek op die strand gedeel het) is die eerste De Vette Mossel staangemaak, die deure spreekwoordelik oopgegooi en ….die eerste gaste het opgedaag…en opgedaag…en opgedaag…

Te danke aan volgehoue en gewaardeerde ondersteuning van nuutgevonde mossel-vriende, het De Vette Mossel gegroei en gegroei. Vir Niël is die De Vette Mossel nog steeds soos ‘n vakansie – kaalvoet langs een van die mooiste strande in Suid-Afrika, die blye weersiens van ou Mossel-vriende en die maak van nuwe vriende – elke dag.

Maar De Vette Mossel bestaan nie net uit Niël nie. Staatmaker Nikki Geyer (vir wie niks te veel moeite is nie) is kern tot die Mossel se sukses.

Die dosynstuks braaiers, skoonmakers en kombuispersoneel is ‘n storie op sy eie. Net werklose mense is aangestel, opgelei en vandag is hulle onlosmaakbaar deel van De Vette Mossel-familie. Sonder hulle is De Vette Mossel nie moontlik nie – daarom dat hulle ook in die winste/vrugte van sukses deel.